Монгол хүний мөрийг Африкт гаргахуй

Жич: Гүйлтээр хичээллэдэг, хичээллэх дур сонирхолтой, нас үл харгалзах хэн бүхэнд энэхүү бичлэгийг зориулж үйл явдлыг тодорхой өгүүлсэн болно.

Өглөөний жихүүнд тухайн газрыг олох гэж гудам, өргөн чөлөөний нэрийг гайгүй сайн харж явсан ч хэсэг төөрч будлисаар хүссэн газраа ирэхүйд гудам машинаар хахаж, зарим эзэд замын хажуугийн нарийхан зүлгэн дээр машинаа тавиад, яасан нь мэдэгдэхгүй урагшилж ядах замын хөдөлгөөнөөс залхсан хүмүүс ч бас машинаасаа бууж хувцсаа нимгэлээд нэг л зүг рүү яарч харагдана.

Эртлэн боссон ч гэлээ яг одоо надад 30 хүрэхгүй минут үлдсэн байв. Машинаа тавих зайтай газар хайгаад нэмэргүй бас энэ их урсгал хаана, хэдийд төгсөхийг мэдэхгүй байсан тул бэлэн мөнгө, саравч хоёроо шүүрч аваад замын голд нөхрөө орхиод энд тэндээс гүйлдэх хүмүүсийг даган гүйж эхэллээ.

Урд өдөр нь бэлдсэн гүйлтийн хос хувцсаа сольж өмсөнө, цэврүү үсэрсэн хөлийн хуруунууддаа шархны лент наана, гүйхээсээ өмнө хүч тамирын ундаанаасаа ууна гэх зэрэг төлөвлөгөөтэй байсан ч нөхөртэйгээ хаана, хэдийд эргэн уулзахаа ч ярилцан тохиролцож амжилгүйгээр түмэн хүний хөлд хэдийн орж явчихаж байгаагаа би мэдэж байв.

Хагас км гүйсний дараа хашаанд орж ирэн олны урсгалыг зүсэн учраа олохгүй ийш тийш харан эргэлдэн зогстол "Бүртгэх газар тэнд" хэмээн нэгэн хар залуу анхаарал тавив. Уртаас урт үргэлжлэх дугаарт очиж зогсохдоо "Урьдчилан бүртгүүлэлгүйгээр дахиж л тэмцээнд оролцохгүй юм шүү" гэж хатуу бодсонсон.

Би 10 км-т гүйх юм, энд дугаарлах нь зөв үү гэж ардаа зогсоо намхан залуугаас лавлавал "Чи зөв газраа зогсож байнаа" гэсний дараа мөн их хүн иржээ гэх мэтээр бид хоёр дуугүй байсангүй. Хааяа иймэрхүү цугласан олны дунд орохоор Монгол Наадмын дурсамж сэдэрдэг нь үргэлж машинтай зорчдог, тийнхүү зорчихоос ч аргагүй орчин нөхцөлтэй холбоотой биз ээ.

5 км, 10 км, 21 км гэсэн тэмдэг бүхий ширээнүүд эгнэсэн байх ба 10 км-ийн ширээнд очоод яг тааруулж авчирсан 40 Ранд-аар түр зөвшөөрөгдсөн дугаар худалдан авч нэр усаа бичин энгэртээ торгоогоод, 10 км-ийн зайд гүйж буйг илтгэх жижигхэн шар хуудсаа ташаандаа зүүгээд олны дунд орж зогслоо. Тийн зогсоход хүмүүсийн нүд бие биенийхээ энгэр дэх дугаар луу чиглэх нь дугаарын дор тухайн хүний нэр, нас, утасны дугаар зэрэг хувийн мэдээлэл бичигдсэн байдаг ч олонхи нь бөглөөгүй хоосон орхисон харагдана.

Хэсэг хугацааны дараа буун дуу сонсогдсон авч хүмүүс хөдөлгөөнд ороогүй тул 21 км-ийн зайн оролцогчид эхэлж гараанаас гарч байгаа байх нь хэмээн бодсон ба нэлээд хугацааны дараа хүмүүс урагшилж том хаалгаар гараад гудамжинд залгангуутаа гүйж эхэлж байгааг үзээд уралдаан эхэлсэн гэдэгт итгэхэд ч бэрх санагдсаныг нуух юун. Бөөгнөрсөн олны дунд гүйнэ гэдэг хэцүү тул бас л замаас гарч замын хажуугийн зүлгэн дээгүүр цөөн хэдэн хүнийг дагаад гүйхдээ их л олон бүлэг хүмүүсийг ардаа орхисон санагдсан ч шулуун зам өгсөж ирэхүйд урдах замыг бүхэлд нь бүрхэх түмэн хүмүүс алган дээр мэт тод үзэгдсэнд тэр олон хүмүүсийг хэзээ ч гүйцэж барахгүй гэсэн урамгүй бодол төрөөд авсныг ч дурдах учиртай. Хэдэн мянган хүн өмнө минь бөглөж байснаас гараанаас гарах буун дуунаас хэзээ хойно би гүйж эхэлжээ гэдгээ тэгэхэд л бүрэн ойлгосон билээ.

Замын уулзвар бүр дээр содон хантаазтай Маршалууд туг барин зогсож гүйгчдийг чиглүүлэхийн сацуу машинуудыг хаасан байх ба чухам тэр ажлыг гардан хийх ёстой дүрэмт хувцастай Африк замын цагдаа нар үүнийг далимдуулан ажлаа мартаа юу гэлтэй хэд гурваараа бөөгнөрөн замын хажууд ярилцан зогсоо нь харагдана. Туршлагатай тамирчид тэдгээр Маршалуудад хандан "Баярлалаа Маршал аа" хэмээн зөрөх дуулдана.

Хүлээж тэвчээр нь барагдсан зарим нэг жолооч нар оролцогчдын урдуур өрсөн тэмүүлэх нь гүйж яваа хүмүүсийг бухимдуулж байгааг ч үзэв.

Нэгэн зүгт гүйлдэх олны урсгалаас цойлон гарч зам буруулан гүйлдэх ганц хоёр хүн модны араар орж бие засч байгааг нь ч харав.

Зам эрээлэх шүлс нусыг тойрч, дээгүүр нь харайх зэргээр урагшлавч дэргэдэх эрчүүд ч шүлсээ нулимаад хаячих нь дургүйг минь хамгийн ихээр хүргэж байгааг ч мэдэв.

Уснаас дөнгөж саяхан гараа юу гэлтэй үс гэзэг, хүзүү нуруу нь нойтон үзэгдэх цагаан эмэгтэйн ард гүйж явахдаа хөлс нь нүүрэн дээр үсрэхийг ч мэдрэв.

Хар гэлтгүй зарим нэг цагаан хүмүүсийн араас гүйж явахад хэзээний танил эвгүй нэгэн үнэр үе үе сэвэлзэх. Яаж ч хөлөрлөө гэсэн Монгол хүний биенээс тийм үнэр ялгардаггүй нь бахархмаар...

Зүүн гар талд 6 гэсэн тэмдэг нүднээ тусахад 6 км гүйсэн эсвэл 6 км өмнө минь хүлээж байгаагийн аль нь болохыг мэдэн будлисан ч дараагийн удаад таарсан 7-гийн тоог хараад 7 км-ийг ардаа орхижээ гэж ойлголоо.

Өгсөлт байн байн үргэлжлэх нь энэ удаагийн тэмцээний зам амаргүй, хатуухан байгааг илтгэх ба зогсох нь бүү хэл алхаж л болохгүй юм шүү гэж өөртөө байнга сануулж явсан нь энэхүү уралдааны хамгийн гол зарчим минь байсан юм.

Хүмүүсийг хэзээ км-ийн ангиллаар нь салгаж тусгаарлах юм бол гэж гайхахдаа шар хуудас зүүсэн хүмүүсийг нүдээрээ эрж, бас үе үе таарах Маршалуудыг чиглэл өгч магад хэмээн горьдсоор нэг л мэдэхэд хүсэн хүлээсэн 9-ийн тоогоо замын хажуугаас олж хараад нэгхэн км-ийн дараа тэмцээн дуусах нь гэж бодохоос баярлах сэтгэл төрнө гэдэг тоймгүй.

Нэг хүн замын голд зогсчихсон "21 км ийшээ, 10 км ийшээ" хэмээн оролцогчдыг хоёр тийш хувааж, тэндээс шууд л талбай руу туузаар тусгаарласан замаар гүйсээр барианд ирэхэд барианы дээдэх том цаг 1 цаг, 2 минут, 10 секундыг зааж байлаа.

1 цагаас хол хоцрохгүй барианд орно гэдэг миний хувьд маш сайн амжилт бөгөөд гүйлтээр байнга хичээллэдэг хүмүүсийн хувьд Magic Time гэгддэг 53 минутаас өмнө амжиж барианд орох сонирхол их байдгаас Magic Time-аас хэдхэн минутын хойно ирсэндээ бяцхан догдолсон билээ.

21 км-ийн зайн уралдаанаас 2-т орж ирсэн Этиоп улсын тамирчинг зальдсан гэдэг шалтгаанаар дэд байранд бүртгэж аваагүй, мөн эхний 20-д ирсэн хэд хэдэн мэргэжлийн тамирчдыг хүлээн зөвшөөрөөгүй тухай зарлаж байсан ба оролцогчид гараанаас гарахын хэдхэн минутын өмнө дугаар зүүсэн хэд гурван хүн хашааны гадна тэс өөр зүг рүү гүйж зөрсөн тухай тэмцээний дараа нөхөр маань гайхан хэлж байсан нь ч нэгийг өгүүлнэ. Тийнхүү урьдчилан зам товчилсон нөхдүүд гүйж яваа түмэн олонтой замын хажуугийн хаа нэгтэйгээс нийлдэг, замаа харан амьсгаа дээр гүйж яваа оролцогчид тэдгээрийг төдийлэн анзаарах сэхээгүй байдгийг зальжин хүмүүс тооцоолсон байдаг бололтой.

10 км-ийн замыг дуусгасан хүн болгонд саравчтай малгай, харин 21 км-т пудволк бэлэглэж, оролцогчдыг бүгдийг нь хүйтэн Кола-гаар дайлж байлаа.

Тоогоо алдсан хүмүүс оролцсоных биз, зураг авч зарах үйлчилгээ тэнд байгаагүйд сэтгэл гонсойсон ч үргэлж бөөнөөрөө урд хойноо орон гүйсэн хүмүүсийн зургийг авах боломжгүй байсан гэвэл зөв болох байх.

Уралдааныг тайлбарлагч хижээл эр янз бүрийн клубийн байнгын оролцогчдыг сайн таньдаг нь түүний хөгжилтэй яриа, танилцуулгаас илэрхий байсан бөгөөд энэ улсад тохиолддог олон хар гэмт хэргийн нэг болох бусдын орон гэрт халдан дээрэм тонуул хийх дээрэмчдийн буунд өртөж гэртээ харамсалтайгаар амь насаа алдсан нэгэн залууг эргэн дурссан ба тэрбээр олон ч уралдаан тэмцээнд хурд самбаагаа сорьж байсан идэвхтэй оролцогч байжээ.

21 км-ийн замд гүйсэн Африк залуу бариан дээр ухаан алдаж унасан, замын уулзвар дээр нэгэн эмэгтэй оролцогч машинд мөргүүлж хөнгөн гэмтсэн зэрэг бас бусыг эс тооцвол 3000 хол давсан оролцогчтой том тэмцээн амжилттай болж өндөрлөсөн юм.

Миний бие нөхрийнхөө барагцаалснаар 200 гаруй хүний дараа барианд орсон бололтой. Уралдаан тэмцээнд хэдэд жагсах нь чухал бус харин тэндээс сэтгэлийн таашаал, баяр баяслыг өөртөө шингээж авах нь л гол утга учир бөлгөө.

Тайлбар

Түр зөвшөөрөгдсөн дугаар - Temporary License /Ямарваа нэгэн клубийн гишүүн биш оролцогч уралдаанд оролцох бүрдээ түр зөвшөөрөгдсөн дугаарыг 15 Ранд-аар худалдаж авдаг ба тэрхүү дугаар нь тухайн тэмцээнд л хүчин төгөлдөр юм. Үүн дээр нэмэгдээд тэмцээнд оролцох эрх нь 25 Ранд-аас эхлээд тогтсон хэдэн үнэ өртгийн хооронд хэлбэлзэж байдаг/

Оролцогчид барианд цувран ирсээр...

Уралдааныг амжилттай дуусгасан оролцогчдод пудволк бэлэглэж буй нь

Өмнөд Африкийн хамгийн алдартай хоол болох Boerewors буюу фермийн хиамыг талханд хавчуулан худалдаалах цэг

Туршлагатай тамирчид

Дараагийн бас нэгэн уралдааны бүртгэл хэдийнээ эхэлжээ.