Монгол хүний мөрийг Африкт гаргахуй

Тэртээх нэгэн он цагт үл таних нэгэн хүнтэй хамт анх чи над дээр ирэхдээ ихэд цочирдсон бас алмайрсан нүдээр намайг харж давлагаан чимээ байтугай зөөлөн элсэнд минь ч хөл чинь шигдэхээс эмээж зогссон.

Эрч хүчээрээ аархан хөөсрөх давлагаанаас минь үнэхээрийн сүрдэж эрэг өөд хурдлан тэмүүлэх чи удах тусмаа дасч, нар шингэхийн алдад харин ч бүр тэдэнтэй минь уралдан тоглож эхэлсэнсэн.

Бүсгүй чамайг би мартаагүй, мартахын ч аргагүй өвөрмөц сонин бүсгүй тэр л байгаагаараа намайг гайхшруулж бас алмайруулж байсан. Ихэд эмээсэн харцнаас чинь эрэмшсэн би давлагаагаа улам ихээр эрчилж, царайнд чинь айдастай хамт гэрэлтэх баяр хөөрийг шавхахыг хүсэхэд тэднээс минь сүрдэх чиний хашхираан өөрт чинь хүч өгөх мэт давлагаанаас амжиж зугтсаар хуурай элсэнд хүрсэн даруйдаа чи буцаад л над руу гүйх.  

"Болгоомжтой байгаарай. Давлагаа маш хүчтэй. Давлагааг чи харж байгаа ч хормын зуур л өөр нэг давлагаа чамайг залгина шүү" гэж тэр танихгүй хүн анхааруулахад хариуд нь асуусан асуулт чинь чамайг огт өөр ертөнцөөс ирснийг тэгэхэд надад ойлгуулсан.

Алхам алхмаар чи над руу ойртсоор давлагаа ташааг чинь цохиход л энэ бол тоглоом биш гэдгийг чи ухаарсан... Өмнө чинь хөлгүй их уснаас өөр юу ч үгүй тийм л хоосон авч дүүрэн ертөнц чамд зүйргүй сонин байсныг харцнаас чинь төвөггүй уншихаар байсан. Хоосон харагдах тэр ертөнцийн ер бусын урин дуудах нууцхан холбоог чи бас мэдэрч байсныг ч би мэднэ...

Хүүхэд шиг тийн орилж хашхиран давлагаанаас зугтах чамтай хамт үдшийг тун ч жаргалтай өнгөрүүлсэн ба тэр хүнд надаас илүү чи сонин байгааг би ажигласан. Чилгэр сайхан биетэй... цагаан арьст тэр залуу чамаас тэс өөр хүн байсан. Чамд юугаа ч зориулахад бэлэн түүнийг чи анзаараагүй, харин намайг бишрэн шүтэж байсныг чинь тэрбээр ойлгож байсаан.

"Буцах цаг боллоо" гээд өнөөх хүн чамайг надаас харамлах шиг машиндаа суулгаад авч одсон...

Харин өнөөдөр чи эргээд иржээ, тэгэхдээ тэр залуутай хамт.

Африкийн халуун нарыг тэвчиж эс чадан борлосон хуруунуудын чинь нэгэнд хос бөгж гялалзаж, харцанд чинь хайр гэрэлтээд нутгийн минь залууд чи бууж өгчээ.

Давлагаагаар туугдаж ирээд эргийн элсэнд шигдэн далдрах далайн дунгуудыг элснээс нь ухаж гаргахдаа хөөрч баярласан дуугаар "Надад туслаач" гэж өнөөх залуугаас хүсч байсан, алаг нүдэн аравгар хавчнуудыг ч үүрнээс нь гарсан даруйд нүхийг нь бөглөн өөр нүх рүү хөөж оруулаад хооронд нь байлдуулан баясаж суусан чамайг одоо ч би тодхон санаж байна.

Далайд шингэх нарыг хармаар байна гэхэд чинь "Ийм газар харанхуй болтол байх нь аюултай" хэмээн тэр хүн хэлж байсныг ч мартаагүй ээ. "Энэтхэгийн далай дээр наран жаргахыг харах боломжгүй, харин Атлантын далай байсан бол..." гэж нэмж хэлсэн түүний үгэнд чи итгэсэн.

Одоо чи буцаж ирээд наран шингэх цагийг хүлээн зогсоно. Тэртээх он цагт үзэж чадаагүй гайхамшигт агшныг эргүүлэн төлөхөөр миний нутгийн залуу хажууд чинь бас зогсоно.  

Эрч хүчээрээ аархан хөөсрөх давлагаа

Давлагаагаар туугдаж ирээд эргийн элсэнд шигдэн далдрах далайн дун

Нар шингэх цагаар

Нар шингэсний дараа