Монгол хүний мөрийг Африкт гаргахуй

Африкийн саванна, Африкийн ойн, Азийн гээд хэдэн төрлийн заан байдаг ч та бүхнийгээ уйдааж чилээхгүйн үүднээс асуусан асуултынхаа хүрээнд захирагдаж басхүү нэг уншсан ч мартагдахааргүй, сонирхол татахуйц хэдэн мэдээллийг хүргэхээр төлөвлөлөө. Асуулт хариултад оролцсон уншигчид маань олон нарийн мэдээллийг олж идэвхтэй хандсаныг "Заан үзсэн азтай аялал" гэх түрүүчийн бичлэгээс сонирхсон нэг нь орж танилцана биз ээ.

Африкийн болон Азийн зааны нэгэн гол ялгаа нь тэдний хошууны төгсгөлд байдаг. Африкийн зааны хошууны төгсгөл хоёр хуруутай, алив зүйлийг хоёр хурууныхаа тусламжтайгаар өргөж авч чаддаг бол Азийн зааны хошуу нэг хуруутайн улмаас ямар нэг зүйлийг хошуугаараа бүтэн ороож өргөж авдаг сонирхолтой ялгаа байна.

Загатнасан нүд чихээ маажих, навч жимсийг модноос авахад хошуу чухал үүрэгтэйн дээр усан дор байхдаа хошуугаа усны мандал дээр гарган хааяа нэг чимээ ихтэй амьсгалах нь бахадмаар ч, эндүүрсэн хүнд тэрхүү хошуу бүдүүн могой лугаа адил харагдах нь бас л сонирхол татахуйц.

Усны мандал дээр хошуу зөвхөн амьсгалахад бус хаа холоос салхины хамт туугдан ирэх зүйлсийг мөн үнэртэнхэн зогсдог байна.

Заанууд хошуугаараа хоорондоо барилдан тоглох нь олонтаа.

Аюул учирч байгааг мэдрэхдээ тэд хошуугаа агаарт өргөх, харин хошуугаа хумин дотогшлуулах нь хошуугаа хамгаалсны илрэл болдог. Арслан гэх мэт араатан амьтад зааныг дайрахдаа юун түрүүн хошууг нь хазах аюул байдгаас тэр.

Нөгөө нэг гол үнэхээр мэдүүштэй ялгаа нь Африкийн зааны чих Африк тивийн газрын зураг шиг хэлбэртэй бол Азийн зааны чих Энэтхэг улсын газрын зураг шиг хэлбэртэй байдаг. Үүнийг уншигчдаас зөвхөн ЗолбинББ хэлсэн юм.

Аюул тулгарахад зааны чих бүтэн дэлгэгдэх нь сүртэй, сүрдмээр харагддаг. Хүн бидний чихэнд хүрч сонсогддоггүй авиаг тэд сонсож чаддаг бөгөөд чанга хүчтэй орилох мэт авиа гаргаж холын холд байх бие биендээ дохио өгч байдаг.

Заан халуунд халууцахаараа хөлөрдөггүй ч асар их цус чихээр нь урсаж байдгаас чихээ сэнс адил нааш цааш биендээ цохин хөдөлгөх нь бие дэх халуун цусны эргэлтийг сэрүүцүүлдэг, тиймээс салхин дор чихээ дэлгэн зогссон байх нь их тааралддаг.

Чихний нүх нь чихнийхээ ард байрлах ба ядарч туйлдсан үед эсвэл үхсэн нэгнийхээ араас гашуудах үед эдгээр нүх уйлж эхэлдэг нь гайхмаар.

Заан зөвхөн том, сонин төрхтэй амьтан ч биш, харин ухаантай, зовлон гуниг, өвдөлтийг мэдэрдэг мэдрэмжтэй амьтан юм.

Олон уншигчид маань зааны арьсны өнгийг авч хэлэлцсэн нь учиртай. Зузаан, гөлгөр арьс нь хар саарал харагдах ч шаварт орсны дараагаар өнгө нь өөрчлөгддөг. Элдэв шавьж ялааны хазалт, нарны хэт туяанаас сэргийлж шаварт орж зогсон шавраар өөрийгөө шүршдэг, харин нялх тугалын арьс наранд ноцтой түлэгдэх аюултай тул эхийнхээ дор сүүдэрт нь зогсдог ажээ.

Сүүн тэжээлт амьтдаас хамгийн том уураг тархитай амьтан бол заан. Тиймээс маш ухаантай бас бие биенээсээ суралцдаг, гэр бүлсэг амьтад. Толинд тусах өөрсдийнхөө дүрсийг хүртэл таньж чаддаг гэх.

Эх заанууд залуу эр заан, залуу эм заанд хандах хандлагын хувьд өөр, маш ухаантай, сургамжтай байдгаас залуу эм заанууд эхтэйгээ хамт үлдэж, харин залуу эр заанууд 15 наснаас нас биед хүрсэн эр зааны эгнээнд элсдэг. Сүрэг дэх хамгийн хүчтэй бас ухаантай эм заан залуу эр заануудыг сүрэг дотроо цус холилдох үйлдэл хийхээс сэргийлэх, мөн тэднийг 25 нас хүртэл нь сүргийн толгойлогч эм заанууд хянаж, зааж сургадаг гэхээр бас л сонирхолтой. Толгойлогч эм заануудын нөлөөгөөр залуу эм заанууд 16 нас хүртлээ үржлийн харьцаанд ордоггүй гэнэ.

Хүн төрөлхтний нэг өдөр үгүй хийж чадах ойг Африкийн бүх заанууд нэгдээд ч нэг жилийн туршид идэж байж дуусгана гэсэн мэдээлэл байдаг нь хүмүүс бид энэ дэлхий дээрх хамгийн хөнөөлтэй амьтад төдийгүй харин ч өөрсдөөсөө илүү зааныг хөнөөлтэй хэмээн үзэж мянга мянгаар нь устгасаар байна.

Дээхнэ цагт хүмүүс зааны том, ахмадыг нь устгаж залууг нь үлдээснээр залуу заануудад зааж сургах ахмадууд үгүйгээс тэд хүмүүжилгүй болж өсөн, тухайн газар нутаг дахь бусад амьтдыг дайрч хөнөөх, хөөх зэрэг сөрөг үр дагавар гарч байснаас сүүлдээ зааныг устгахдаа тухайн сүргийг бүхэлд нь устгадаг болсон байна.

Зааныг хайрлан хамгаалах тал дээр өдгөө дэлхийн олон олон хүмүүс дуу хоолойгоо нийлүүлэн хамтран ажиллаж байна.

Нэгнийгээ үхэхэд үхдэл дээр нь уйлж зогсдог, хошуугаараа илж энхрийлдэг эмзэг уяхан амьтад... /Блогийн зураг байршуулалтаас шалтгаалан зургийн тодорхой хэсэг харагдахгүй байгаад хүлцэл өчье/

Салхин дор чихээ дэлгэн зогсох нь

Аюул тулгарахад зааны чих бүтэн дэлгэгдэх нь сүртэй...

Сүргээрээ

Тугал эхийнхээ нөмөрт яваа нь

Хошуугаараа барилдан тоглож байгаа нь

Таны хайртай, дуртай амьтан юу вэ?

Диггсийн хайртай амьтан заан, Скаттынх ирвэс бол миний хувьд анааш. Харин таных?

Африкийн олон сайхан сонирхолтой амьтдаас аль нэгийг нь өөрийн болгон сонгон авч, тэр амьтныхаа талаар улам илүү таньж мэдэх тусмаа амьд байгальд хандах үзэл тань улам төлөвшин, байгаль дэлхийг амтлах мэдрэхүй, онгон зэрлэг амьтдыг сэтгэлээсээ хайрлан хамгаалах хийгээд хүн болж төрсний хувьд хүмүүний дотоод сэтгэлийн нандин чанарыг тань улам тодотгон гэрэлтүүлэх сэтгэлийн хосгүй таашаалт гайхамшгийг та мэдрэх болно гэдэгтээ итгээрэй.

Африкт анх ирээд нүдэнд хамгийн өнгөний хослолтой бас сүрлэг өндөр, гуалиг харагдсанаар нь анаашийг хамгийн хөөрхөн, үзэсгэлэнтэй амьтан байна гэж би бодсон.

Дархан Цаазат Амьтдын Паркаар тэнэх тусмаа, олон амьтдыг үзэх тоолонгоороо явцын дунд заан ч бас миний анхаарлыг татаж, мөн өөрийн нүдээр үзсэн харсан зэрлэг амьтан бүхэн маань өөрийн гэх өвөрмөц төрх, давтагдашгүй гайхамшигт шинж чанаруудтай байдаг юм байна гэдгийг ухаарч, тэдний зүгээс надад дамжуулан ойлгуулах байгалийн ариун нандин, ер бусын холбооны талаар бага багаар мэдэрсээр одоо тэдэнтэй сэтгэл зүрхэндээ шингэтэл нягт холбоотой болсондоо хүмүүний ойлгох ёстой хамгийн чухал тайллын нэгэн гэрч нь болсон хүн гэж би өөрийгөө тоодог билээ.

Сэтгэлд мэдрэгдэх эдгээр гайхамшиг намайг олж авсан шигээ хэзээ ч орхихгүй гэдэгт итгэдэг ч энэхүү таашаалыг зөвхөн өөртөө амтлаад байх биш, бусадтай хуваалцах, мөн хүсэл эрмэлзэл тээсэн бусдыг ч бас араасаа дагуулах сэтгэлийн үүднээс блог маань нээгдэж, амьдрал зөвхөн хүний хоорондын харилцаа холбоо, тэмцэл зөрчилдөөн биш, түүнээс цаашхи далд орших сэтгэлийн агуу их, хэмжээлшгүй цар хүрээний асуудал байдаг талаар харилцан ярилцаж мэдрэхийн хүслэн намайг ийнхүү энд уясаар байнам.

***

Асуултанд идэвхтэй оролцон хариулт үлдээсэн Amie, ЗолбинББ, Embi, Dream_silver, Сайхан санаа, Bataa123, Битмин, Хэлтэрхий, Indra, Leo, Amanjinka, зурвас илгээсэн Enkhee5 нартаа бүгдэд нь блогийнхоо өмнөөс маш их талархаж, "Та өөр хэн нэгнийг тантай цуг өөрчлөгдөн хувирахыг хүлээх хэрэггүй. Таныг хөдөлж эхлэхэд дэлхий хөдөлдөг. Таны өөрчлөгдөж байгаа хир хэмжээгээр таны амьдралд оролцон тоглогсод өөрчлөгддөг буюу шинэ оролцогсод орж ирдэг. Тэд танд тусалж дэмжиж юм зааж сургаж байх явцад та ч мөн тэдэнд тусалж дэмжиж, зааж сургаж байдаг" гэсэн Эндрю Мэтюсийн "Сэтгэл зүрхээ дага" номноос авсан сайхан ишлэлээр та нартаа урам нэмье.

АНУ-аас ЗолбинББ-ийн хариулт тун ойрхон тусч, Австралиас оролцсон Indrа-гийн хариулт байгаа зөв оносон бол Солонгос улсад сурч байгаа Dream_Silver-ийн хувьд олон ч мэдээллийг өгч, тэр дотор зөв хариулт өгсөн эхний хүн болсон учраас Indrа, Dream_Silver хоёртоо хоёуланд нь Өмнөд Африкийн ил захидлууд илгээхээр шийдлээ.

Энэхүү бичлэгтэй хамт дээрх хоёр хүний хувийн хаягаар мэдээлэл давхар очиж байгаа бөгөөд ямар амьтны зурагтай ил захидал хүлээн авах хүсэлтэй байгаагаа өөрсдийн шуудангийн хаягийн хамт хариу илгээхийг миний бие хүлээн суугаа, мөн ил захидал замаасаа алдагдах, гэмтэхээс сэргийлж дугтуйнд хийж илгээнэ гэдгээ урьдчилан сануулъя. Сонгогдсон ил захидал илгээгдэхээс өмнө би зургийг нь авч, эзэндээ хүрсний дараа захидлыг хүлээн авлаа гэсэн мэдэгдлийн хамт та бүхэндээ сонирхуулан хуваалцана гэдгээ дуулгахад таатай байна.

Хайртай, дуртай, сонирхдог амьтдаа нэрлэсэн доорх сэтгэгдлүүдээс үүдсэн "Андууддаа" бичлэгийг энд дарж сонирхоорой.

Тайлбар

Африкийн саванна заан - African Savannah

Африкийн ойн заан - African Forest

Азийн заан - Asian Elephant

Нэмэлт мэдээлэл

Сайн байцгаана уу?
Хамгийн олон уншигчтай бичлэгт минь хожуу ч гэлээ зочлоод гарч байгаа уншигч та өөрийн хайртай, дуртай, сонирхдог амьтнаа заавал нэрлээд гараарай гэж би дахин хүсмээр байна.

Мөн нэмж холбогдох мэдээлэл хүргэхэд, Австрали улсад суугаа ялагч Индра маань ил захидлаа аль хэдийн хүлээн авсан ч Солонгос улсад сурч байгаа Dream-silver ялагчид Өмнөд Африкийн ил захидлыг 2 ч удаа илгээгээд эзэндээ хүрээгүй л байгаа тул амласан ёсоороо та нартаа хуваалцах мэдээлэл ийнхүү хойшлогдоод байгаа билээ.
Энэ удаад сүүлчийн ил захидал хүрэхгүй бол 3 дахь удаагийнхаа захидлыг баталгаажуулан явуулахаар зэхэж сууна.

Ингээд та нартаа удахгүй айлчлах гэж буй Шинэ ондоо сэтгэл зүрхээрээ баян байхыг хүсэн ерөөе.

12-р сарын 30, 2008

Дахин сайн байцгаана уу?

Солонгос улсад буй Dream_silver анддаа 3 дахь удаагийн ил захидлаа баталгаажуулан 2009 оны 1-р сарын 27-нд Жоханнесбург хотоос илгээсэн бөгөөд энэ удаа захидал маань заавал очих ёстой гэж итгэл дүүрэн сууна.

Анддаа тусад нь ил захидлынхаа араас мөрдөн хөөх кодыг нь явуулна.

2-р сарын 03, 2009

Dream_silver ил захидлаа хүлээн авчээ. Дэлгэрэнгүйг энд дарж сонирхоно уу.

2-р сарын 13, 2009